கல்லூரி மாணவியை கிராமத்திற்கு வரவழைத்து பாலியல் வன்கொடுமையில் ஈடுபட்டதாக புகார்
மயிலாடுதுறை அருகே இன்ஸ்டாகிராமில் பழகி கல்லூரி மாணவியை கிராமத்திற்கு வரவழைத்து பாலியல் வன்கொடுமையில் ஈடுபட்டதாக புகார், எட்டு பேரை கைது செய்து மயிலாடுதுறை போலீசார் விசாரணை.
மயிலாடுதுறை மாவட்டம் மயிலாடுதுறை அடுத்த ரூரல் ஊராட்சிக்கு உட்பட்ட பகுதியில் நேற்று இரவு இளம் பெண் ஒருவரை எட்டு இளைஞர்கள் ஒன்று சேர்ந்து பாலியல் துன்புறுத்தலில் ஈடுபடுவதாக காவல்துறைக்கு தகவல் வந்தது.
இதனை அடுத்து மயிலாடுதுறை காவல்துறையினர் பகுதிக்கு சென்று விசாரணை செய்த பொழுது திருவாரூர் மாவட்டம் பேரளம் பகுதியைச் சேர்ந்த கல்லூரி மாணவி ஒருவரை Instagram-ல் பழகிய இளைஞர்கள் கிராமத்திற்கு வரவழைத்துள்ளனர்.
தொடர்ந்து எட்டு பேர் சேர்ந்து அவரை பாலியல் பலாத்காரம் செய்ததாக கூறப்படுகிறது. இதனைத் தொடர்ந்து இளைஞர்களை கைது செய்த காவல்துறையினர் பெண்ணுக்கு மருத்துவ பரிசோதனை செய்ய மருத்துவமனையில் அனுமதித்துள்ளனர்.
ஆனால் மயிலாடுதுறை காவல்துறையில் இந்த சம்பவம் குறித்து தகவல் தர காவல்துறையினர் மறுத்துவிட்டனர். சம்பவம் மயிலாடுதுறையில் பெரும் பரபரப்பை ஏற்படுத்தியுள்ளது.
