மயிலாடுதுறை மாவட்டத்தில் முதல்முறையாக பல்வேறு இடங்களில் பள்ளிக் கல்வித் துறை சார்பில் குத்துச்சண்டை போட்டி, வளைய பந்து மற்றும் சிலம்பம் போட்டிகள் நடைபெற்றன. குத்துச்சண்டை போட்டியை மாவட்ட ஆட்சியர் மகாபாரதி துவங்கி வைத்தார்.
பள்ளிக்கல்வித்துறை சார்பில் மாநில அளவில் மாணவிகளுக்கான வளைய பந்து மற்றும் சிலம்பம் போட்டிகள், மயிலாடுதுறை மாவட்டம் செம்பனார்கோயில் தாமரை மெட்ரிக் பள்ளியில் இன்று தொடங்கியது. மயிலாடுதுறை மாவட்டத்தில் முதல்முறையாக துவங்கிய நிகழ்ச்சியில் 14 வயதிற்கு உட்பட்டோர், 17 வயதிற்கு உட்பட்டோர், 19 வயதுக்குட்பட்டோர் ஆகிய மூன்று பிரிவுகளில் இந்த போட்டிகள் நான்கு நாட்கள் நடைபெறுகிறது. முதல் நாள் போட்டியில் தமிழ்நாடு முழுவதும் மாவட்ட அளவில் நடைபெற்ற போட்டிகளில் முதலிடம் பிடித்த மாணவிகள் அணி மோதின. தொடர்ந்து நான்கு நாட்கள் நடைபெறும் போட்டியில் ஆடவருக்கான போட்டி தனியாக நடைபெறுகிறது.
மயிலாடுதுறை மாவட்ட உடற்கல்வி ஆய்வாளர், உடற்கல்வி இயக்குனர் மற்றும் உடற்கல்வி ஆசிரியர்கள் போட்டிகளை இணைந்து நடத்தினர். இதேபோன்று மயிலாடுதுறை அருகே சித்தர் காட்டில் உள்ள ஏ.ஆர்.சி.விஸ்வநாதன் கல்லூரியில் பள்ளிக்கல்வித்துறை சார்பாக பாரதியார் தினம் மற்றும் குடியரசு தினத்தை முன்னிட்டு மாநில அளவிலான மூன்று நாட்கள் நடைபெறும் குத்துச்சண்டை போட்டியை மாவட்ட ஆட்சியர் மகாபாரதி இன்று தொடங்கி வைத்தார்.
இந்த குத்துச்சண்டை போட்டியில் மயிலாடுதுறை, திருவாரூர், நாகப்பட்டினம், திருச்சி, கோயம்புத்தூர், சென்னை உள்ளிட்ட பல்வேறு மாவட்டங்களைச் சேர்ந்த மாணவிகள் இன்று நடைபெற்று வரும் போட்டியில் 500க்கும் மேற்பட்டோர் பங்கேற்றுள்ளனர். குத்துச்சண்டை போட்டியில் வீராங்கனைகள் ஆக்ரோசத்துடன் மோதிக்கொண்டது பார்வையாளர்களை வெகுவாக கவர்ந்தது. வருகின்ற 31ஆம் தேதி வரை போட்டிகள் நடைபெறுகிறது.
இந்த போட்டியில் வெற்றி பெறும் மாணவிகள் உயர்கல்வியிலும் வேலைவாய்ப்பிலும் தமிழக அரசால் முன்னுரிமை வழங்கப்பட உள்ளது குறிப்பிடத்தக்கது. 29ஆம் தேதி மாணவர்களுக்கான குத்துச்சண்டை போட்டி நடைபெற உள்ளது.இந்நிகழ்ச்சியில் மாவட்ட கல்வி அலுவலர் சாந்தி, ஆட்சியரின் நேர்முக உதவியாளர் பரமசிவம், மாவட்ட உடற்கல்வி ஆய்வாளர் உமா சங்கர் உள்ளிட்ட பலர் கலந்து கொண்டனர்.
