நெல்லை மாவட்டம் மேற்கு தொடர்ச்சி மலைப் பகுதியில் பெய்து வரும் கன மழையின் காரணமாக ஒரே நாளில் சேர்வலாறு அணை நீர்மட்டம் 9 அடியும் மணிமுத்தாறு அணை நீர்மட்டம் 3 அடியும் உயர்ந்துள்ளது. மேலும் மணிமுத்தாறு அருவியில் தொடர்ந்து வெள்ளப்பெருக்கு நீடிப்பதால் இன்று 8- வது நாளாக சுற்றுலா பயணிகள் குளிக்க வனத்துறையினர் தடை விதித்துள்ளனர்.
வங்கக் கடலில் உருவான குறைந்த காற்றழுத்த தாழ்வு நிலை மற்றும் வானில் ஏற்பட்டுள்ள கீழ் அடுக்கு சுழற்சி காரணமாக கடந்த ஒரு வாரமாக நெல்லை மாவட்டத்தில் பரவலாக மழை பெய்து வருகிறது இது போன்று மேற்கு தொடர்ச்சி மலைப்பகுதியில் தொடர்ந்து கன மழை நீடித்து வருகிறது. இதன் காரணமாக மாவட்டத்தின் பிரதான அணைகளின் நீர்மட்டமும் உயர்ந்து வருகிறது இந்த நிலையில் 156 அடி கொள்ளளவு கொண்ட சேர்வலாறு அணையின் நீர்மட்டம் ஒரே நாளில் 9 அடி உயர்ந்து 91.34 அடியாக உள்ளது. 118 அடி கொள்ளளவு கொண்ட மணிமுத்தாறு அணை நீர்மட்டம் ஒரே நாளில் 3 அடி உயர்ந்து 76.07 அடியாக உள்ளது அணைக்கு வினாடிக்கு 1782 கன அடி தண்ணீர் வந்து கொண்டு இருக்கிறது.
இதுபோன்று மேற்கு தொடர்ச்சி மலைப் பகுதியில் மழை நீடித்து வருவதால் அம்பாசமுத்திரம் அருகே உள்ள மணிமுத்தாறு அருவியில் தொடர் வெள்ளப்பெருக்கு ஏற்பட்டுள்ளது இதன் காரணமாக இன்று எட்டாவது நாளாக மணிமுத்தாறு அருவியில் சுற்றுலா பயணிகள் குளிக்க வனத்துறையினர் தடை விதித்துள்ளனர் இதே போல் களக்காடு தலையணையிலும் நீர்வரத்து அதிகரித்துள்ளதால் அங்கும் சுற்றுலா பயணிகள் குளிக்க தடை விதிக்கப்பட்டுள்ளது. மேலும் நெல்லை மாவட்ட பகுதியில் நேற்று பிற்பகல் முதல் ஓய்ந்திருந்த மழை இன்று மீண்டும் காலை பெய்யத் தொடங்கியது பாளையங்கோட்டை நெல்லை சந்திப்பு தச்சநல்லூர் , கே டி சி நகர் டவுன், வண்ணார்பேட்டை உள்ளிட்ட பல்வேறு பகுதிகளில் பரவலாக மழை பெய்து வருகிறது. மாவட்டத்தில் அதிக பட்சமாக நாலுமுக்கு பகுதியில் 6 சென்டி மீட்டர் மழை பதிவாகியுள்ளது.
